Kriştianu Ronaldu karyerasını başa vura bilər

Səudiyyə Ərəbistanının "Əl-Nəsr" klubunun portuqaliyalı hücumçusu Kriştianu Ronaldu idmandan ayrılmağa hazırlaşır.

"Ulusum.az xəbər verir ki, bu barədə "Teamtalk" məlumat yayıb.

Mənbənin məlumatına görə, 39 yaşlı hücumçu hazırkı "Əl-Nəsr" klubu ilə müqaviləsinin sonunda peşəkar karyerasını başa vurmaq barədə düşünür. Bununla yanaşı, Ronaldu Portuqaliyaya qayıdaraq, yerli klublardan biri ilə son müqaviləsini imzalamaq variantını da istisna etmir.

Səudiyyə komandası üçün keçirdiyi 83 oyunda Ronaldu 74 qol vurub və 18 məhsuldar ötürmə edib.

Səudiyyə Ərəbistanı çempionatının turnir cədvəlində "Əl-Nəsr" hazırda 25 xal toplayaraq dördüncü yerdədir. Çempionatın lideri isə 36 xala sahib olan "Əl-İttihad" komandasıdır.

Ronaldu ailəsi ilə birlikdə 2023-cü ilin yanvar ayından Səudiyyə Ərəbistanına köçərək "Əl-Nəsr" klubunun hücumçusu olub. Ölkədə kişi və qadının nikah olmadan birgə yaşamasına icazə verilməsə də, əfsanəvi futbolçuya xüsusi icazə verilib və o, uşaqlarının anası ilə birgə yaşaya bilir.


Səidə Mustafa