“Taliban” İrana on minlərlə təlim keçmiş hərbçi gətirib

“Taliban” İrana on minlərlə təlim keçmiş hərbçi gətirib.

İran hökumətini və rəsmilərini daim tənqid atəşinə tutan “İslam Respublikası” qəzeti “Taliban” hərəkatının on minlərlə təlim keçmiş hərbçisini İrana gətirərək müxtəlif bölgələrdə yerləşdirməyi bacardığına toxunaraq, 14-cü hökumətdən tez bir zamanda bu təhlükə ilə mübarizə aparmağı istəyib.

Qəzet yazıb ki, beynəlxalq səviyyədə heç bir ölkə Talibanı dövlət kimi tanımır və BMT hələ də bu hərakatı terrorçu və qanunsuz hesab edir.

“13-cü hökumət (İbrahim Rəisi) “Taliban”a bütün şəraiti yaradıb. Taliban bu imkanlardan istifadə edərək, on minlərlə təlim keçmiş qüvvəsini İrana gətirə və onları müxtəlif bölgələrdə yerləşdirə bilib. Bu adamların hətta silahları var və ölkənin şəhərlərində, hətta kəndlərində çoxlu cinayətlər törədiblər”, - deyə, qəzetdə yazılıb.

Qəzetdə qeyd olunub ki, Kerman, Məşhəd və Şirazın Şahçıraq ziyarətgahında baş verən terror aktlarını həyata keçirənlərin çoxu Taliban üzvləridir. (Aftab News)

Eltun Məmmədov