Böyük Britaniyada ən iri qarət...

Londondakı Hitrou hava limanı yaxınlığında Samsung mobil texnikasını daşıyan yük maşını oğurlanıb. İlkin məlumatlara görə, ümumi zərər 10,6 milyon dollar dəyərində qiymətləndirilir ki, bu da hadisəni Böyük Britaniyada qeydə alınmış ən iri elektronika oğurluqlarından birinə çevirir.

Ümumilikdə 12 min cihaz itirilib, onlardan 5 mindən çoxu Samsung-un ən yeni qatlanan modelləri – Galaxy Z Flip 7 və Fold 7-dir. Həmçinin oğurlananlar arasında Galaxy S25, Galaxy A16 və 5000 ədəd Galaxy Watch 8 ağıllı saat modelləri də var, – bu barədə unian.net yonhapnewstv.co.kr-ə istinadla xəbər verir.

Nəşrin qeyd etdiyinə görə, qarət əvvəlcədən planlaşdırılıb, çünki yük maşını məhsullar hava limanına çatdırılan kimi demək olar ki, dərhal oğurlanıb. Britaniya polisi hadisə ilə bağlı istintaqa başlayıb və artıq oğurlanmış konteyneri tapıb. Lakin onun içərisində nə isə qalıb-qalmadığı barədə məlumat verilmir.

Samsung-un bu telefonlar üçün sığortası olduğundan şirkət böyük maliyyə itkisi yaşamayacaq. Amma alıcılara diqqətli olmaq tövsiyə olunur: oğurlanmış cihazlar tez-tez ikinci əl bazarlarda peyda olur və onlar qara siyahıya düşə və ya rəsmi texniki dəstəkdən məhrum ola bilərlər.

Britaniya polisinin qiymətləndirməsinə görə, oğurlanmış mobil texnikanın 75 faizə qədəri ölkədən kənara çıxarılır ki, bu da onların tapılmasını xeyli çətinləşdirir.

Ulusum.az