Cəlilabadda meşə yanğını şiddətləndi – Havaya Helikopter Qaldırıldı

Cəlilabad rayonunun Zopun kəndi istiqamətində dağlıq-meşəlik ərazidə güclü yanğın baş verib. Hadisə barədə məlumat Fövqəladə Hallar Nazirliyinin "112" qaynar xəttinə daxil olduqdan dərhal sonra əraziyə Nazirliyin qüvvələri göndərilib.

FHN-dən verilən məlumata görə, alovun sürətlə yayılmasının qarşısını almaq və söndürmə işlərini daha effektiv aparmaq məqsədilə Aviasiya dəstəsinin iki ədəd helikopteri, eləcə də Dövlət Yanğından Mühafizə Xidməti və Xüsusi Riskli Xilasetmə Xidmətinin əməkdaşları əraziyə cəlb olunub.

Yanğınla mübarizə tədbirləri hazırda da davam edir. Təəssüf ki, hadisə nəticəsində bir nəfər – 1976-cı il təvəllüdlü meşə təsərrüfatı işçisi Qəni Nəzirov tüstüdən zəhərlənib. O, dərhal təcili tibbi yardım briqadası tərəfindən xəstəxanaya çatdırılıb.

FHN-dən əhaliyə çağırış: meşəlik ərazilərdə ehtiyatlı olun!

Ulusum.az