Euronews Georgia-nın qurucusu Ramişviliyə 10 il həbs cəzası təhlükəsi

Gürcüstanın tanınmış iş adamı, Silk Road Group, Silknet və Euronews Georgia şirkətlərinin qurucusu Georgi Ramişvili qanunsuz silah saxlamaq ittihamı ilə saxlanılıb. Məlumatı Gürcüstanın Daxili İşlər Nazirliyi təsdiqləyib.

İş adamına qarşı irəli sürülən maddə atıcı silahların, sursatın, partlayıcı maddələrin və qurğuların qanunsuz əldə edilməsi, daşınması, saxlanması və istifadəsi ilə bağlıdır.

KİV-in məlumatına görə, Ramişvili 6 iyul, bazar günü saxlanılıb. İttiham təsdiqlənərsə, ona 10 ilədək həbs cəzası verilə bilər.

Qeyd edək ki, Silknet və Silk Road Group 2024-cü il noyabrın 30-da – Gürcüstanda hökumət əleyhinə etirazların başlamasından iki gün sonra – ölkənin Avropa İttifaqına üzvlük yolunu dəstəklədiklərini bəyan etmişdilər.

“Biz inanırıq ki, Gürcüstan konstitusiya kursundan yayınmamalı və Avropa məkanının bir hissəsi olaraq qalmalıdır. Bu yoldan imtina — azadlıqdan, inkişafdan və gələcəkdən imtinadır. Dinc etirazçılara qarşı zorakılığa “yox” deyirik”, – şirkətlərin bəyanatında bildirilirdi.

58 yaşlı Ramişvili Silknet şirkətinin müşahidə şurasının sədridir. 2020-ci ildən etibarən Silknet-in dəstəyi ilə Gürcüstanda Euronews Georgia telekanalının yayımı başlamışdı.

Georgi Ramişvili həmçinin 2018-ci ildə sabiq baş prokuror Otar Parxaladzenin toyunda şahid olub. Parxaladze 2023-cü ildən ABŞ sanksiyaları altındadır.

Ramişvili bir zamanlar Batumidə Trump Tower layihəsinin həyata keçirilməsini planlaşdırırdı. Layihə 2012-ci ildə Mixail Saakaşvilinin iştirakı ilə təqdim olunsa da, Donald Trampın ABŞ prezidenti seçilməsindən sonra bu razılaşma ləğv olunmuş və tikinti dayandırılmışdı.

Ulusum.az