Çörək Zavodu Tük İddialarına Cavab Verdi

Sosial şəbəkələrdə yayılan görüntülərdə marketdən alınan çörəyin içindən tük və naməlum qırıntıların çıxması iddiası geniş müzakirələrə səbəb olub. İddia olunur ki, sakin artıq üçüncü dəfədir bu cür hallarla qarşılaşır.

Məsələ ilə əlaqədar ATV News Bakı çörək zavoduna müraciət edib. Müəssisənin rəhbəri Səbuhi Əliyev hadisəni qərəzli böhtan adlandıraraq, belə hallarının milyonda bir baş verdiyini bildirib. O, həmçinin qeyd edib ki, çörəyin içindəki yad cisimlərin istehsal zamanı deyil, mağazada yerləşdirildiyini düşünür.

Müəssisə gigiyenik qaydalara ciddi riayət etdiklərini və avadanlıqlara kifayət qədər sərmayə yatırdıqlarını vurğulayıb. Görüntülər hüquq-mühafizə orqanlarına təqdim edilib və araşdırmaların nəticəsində məhkəməyə müraciət olunacağı bildirilib. Qida Təhlükəsizliyi Agentliyi isə məsələnin regional bölmə tərəfindən qanunvericiliyə uyğun araşdırılacağını açıqlayıb.



"Ulusum".az