Əfsanəvi aktyor və həyat yoldaşı niyə birlikdə həyatını itirdi?

İkiqat "Oskar" mükafatçısı, amerikalı aktyor Cin Hekmenin ölüm səbəbi ürək problemləri olub. Bu barədə "Fox News" telekanalı məlumat yayıb. Bildirilir ki, aktyor uzun müddət xəstəlikdən əziyyət çəkib və bu, onun həyatını itirməsinə səbəb olub.

Məhkəmə-tibbi ekspertizanın nəticələrinə əsasən, Hekmendə ağır aterosklerotik və hipertonik ürək-damar xəstəliyi, koronar arteriyalara stentlərin yerləşdirilməsi və şuntlama əməliyyatı aparılıb. Həmçinin aortal qapaq dəyişdirilib və bədənində biventrikulyar elektrokardio stimulyator quraşdırılıb. Aktyorda xroniki hipertonik böyrək xəstəliyi və Altsheymer xəstəliyinə işarə edən neyrodegenerativ dəyişikliklər də aşkarlanıb.

Cin Hekmen 26 fevral tarixində Santa-Fe şəhərindəki evində ölü tapılıb. Onunla birlikdə həyat yoldaşı, 64 yaşlı klassik pianoçu Betsi Arakava və onların itinin də cəsədləri aşkarlanıb. Məlumata görə, aktyor həyat yoldaşının ölümündən bir həftə sonra vəfat edib.

Araşdırmalar nəticəsində Arakavanın nadir hantavirus sindromundan öldüyü müəyyən edilib. Bu xəstəlik gəmiricilərlə çirklənmiş toz vasitəsilə insana keçir və ağır tənəffüs və ürək çatışmazlığına səbəb olur.

Hazırda cütlüyün cəsədləri hələ də ailə üzvləri tərəfindən təhvil alınmayıb.

✍️"Ulusum".az