"Qarayara" 50 beqemotu öldürdü: Növün yox olma təhlükəsi artıb

Konqo Demokratik Respublikasında yerləşən Virunqa Milli Parkında 50 beqemot qarayaraya yoluxaraq tələf olub. Qeyd edək ki, bu park UNESCO-nun Dünya İrs Siyahısına daxil edilib və 1925-ci ildə yaradılmış ərazidir, 3120 kvadrat mil sahəni əhatə edir.

Alimlərin fikrincə, heyvanlar bakteriyalarla çirklənmiş sudan yoluxa bilər – bu bakteriyalar isə ehtimal ki, ölü heyvanların basdırıldığı yerlərdən, yəni skotomogilliklərdən sızaraq suya keçib.

İnsanlara da təhlükə var

Mütəxəssislər Bacillus anthracis adlı spor yaradan bakteriyanın yalnız heyvanlar üçün deyil, insanlar üçün də təhlükəli olduğunu bildirirlər. Virunqa Parkını idarə edən Konqo Təbiətin Mühafizəsi İnstitutu bildirib:

"Baxmayaraq ki, bu xəstəlik əsasən vəhşi heyvanlara təsir edir, o, insanlar və ev heyvanları üçün də potensial təhlükə yaradır."

Ölən beqemotların çoxu Edvard gölü yaxınlığındakı çayda aşkarlanıb. Tədqiqatlara əsasən, bu kimi kütləvi yoluxmalar Afrikanın digər təbiət qoruqlarında da qeydə alınıb – Qarayara bəzi torpaqlarda təbiətdə təbii şəkildə mövcud olur və illər sonra belə aktivləşə bilər.

Bir vaxtlar dünyanın ən böyük beqemot populyasiyası buradaydı

Edvard gölü bir zamanlar dünyanın ən böyük beqemot populyasiyasına ev sahibliyi edirdi. Lakin 1994-cü ildən bəri Konqodakı müharibə və iğtişaşlar nəticəsində bu say ciddi şəkildə azalıb.

Ekoloji fəlakət siyasi böhran fonunda

Bu dəhşətli ekoloji hadisə Demokratik Konqoda baş verən genişmiqyaslı böhran fonunda yaşanır. Şərq bölgəsində silahlı qiyamçılar hücuma keçib, paytaxt Kinşasada isə daşqınlar nəticəsində onlarca insan həyatını itirib.

Beqemotların kütləvi şəkildə ölümü, həm təbiətə, həm də ictimai sağlamlığa yönəlik ciddi təhdid kimi qiymətləndirilir.