"Azərbaycan Dəmir Yolları" sərnişin daşınmasını 20 % artırdı

Bu ilin yanvar-iyun aylarında "Azərbaycan Dəmir Yolları” QSC (ADY) ötən ilin eyni dövrü ilə müqayisədə 20 % çox - 3 849 804 sərnişin daşıyıb.

Ulusum.az bu barədə səhmdar cəmiyyətinə istinadən xəbər verir.

Məlumata görə, 6 ay ərzində Abşeron dairəvi dəmir yolu xətti üzrə 3 666 518 sərnişin (1 il əvvələ nisbətən 19 % çox), Bakı-Ağstafa-Bakı marşrutu üzrə 160 799 sərnişin (30 % çox), Bakı-Qəbələ-Bakı marşrutu üzrə isə 22 487 sərnişin (2,5 dəfə çox) mənzil başına təhlükəsiz çatdırılıb.

Göstərilən dövrdə Bakı-Ağstafa-Bakı marşrutu ilə hərəkət edən qatarlarda doluluq səviyyəsi 92 % (ötən ilin 6 ayında 90 %), Bakı-Qəbələ-Bakı marşrutu üzrə 61 %(ötən ilin eyni dövründə 50 %) təşkil edib. Bununla yanaşı, Bakı-Qəbələ-Bakı istiqamətində səfər edən sərnişinlərin 10 %-dən çoxu, Bakı-Ağstafa-Bakı marşrutu üzrə isə 7 %-dən çoxu əcnəbi turistlər olub.

14 iyun tarixindən etibarən Bakı-Ağstafa-Bakı xətti üzrə istismara yeni qəbul edilmiş 2 yeni “Stadler” qatarı ilə son 17 gün ərzində 16 mindən çox sərnişin daşınıb.
İlin ilk 6 ayında sərnişindaşıma üzrə ümumilikdə 9 265 reys həyata keçirilib. Bu, ötən ilin eyni dövrü ilə müqayisədə 22 % (ötən il 7610 reys) çoxdur.

2024-cü ilin yanvar-iyun ayları üzrə sərnişindaşıma proqnozu artıqlaması ilə, yəni 101 % yerinə yetirilib.