Arıqlama Preparatları Gənclərin Həyatını Təhlükəyə Atır – Dietoloqlar Xəbərdarlıq Edir

Son illər arıqlama preparatlarına görə çox sayda insanın həyatı təhlükəyə düşür və bu sahə sosial şəbəkələrdə qara biznesə çevrilib

Həkim-dietoloq Ləman Süleymanovanın sözlərinə görə, tibbi bilikləri olmayan şəxslər sosial mediada saxta profillərlə özlərini “dietoloq” kimi təqdim edir, istifadəçiləri aldadaraq arıqladıcı məhsulların satışını həyata keçirirlər.

Belə şəxslər yalançı “diet marafonları” təşkil edir və həmin marafonların müəyyən mərhələlərində müxtəlif həblər, çaylar və kokteyllər satışa çıxarırlar.

Mütəxəssis bildirir ki, bu preparatların tərkibində narkotik təsirli və karsinogen maddələr olur. Bu maddələr qaraciyərə, mədəaltı vəzə, hormon sisteminə ciddi ziyan vurur, həm qadınlarda, həm də kişilərdə sonsuzluğa səbəb ola bilir.

Dietoloqun sözlərinə görə, bu kimi vasitələr xüsusilə gənclər üçün ölümcül nəticələr doğura bilir və buna dair real faciələr yaşanıb.
Sonda Ləman Süleymanova qeyd edir ki, arıqladıcı dərman və kokteyllərin satışının tam şəkildə qadağan edilməsi və bu sahədə ciddi nəzarət mexanizmlərinin tətbiqi həyati əhəmiyyət daşıyır.


Ulusum.az