Trampın Nobel təklifi ABŞ–Hindistan münasibətlərini gərginləşdirdi

ABŞ prezidenti Donald Tramp telefon danışığı zamanı Hindistanın baş naziri Narendra Modiyə işarə edib ki, Nyu-Dehlinin onu Nobel sülh mükafatına namizəd göstərməsi yerinə düşərdi. Bu barədə The New York Times yazır. Nəşrin məlumatına görə, müzakirə 17 iyunda baş tutub və münasibətlərin kəskin pisləşməsinə səbəb olub.

Məlumata əsasən, Tramp Pakistandakı planlardan danışıb — İslamabad onu Hindistan və Pakistan arasında atəşkəs danışıqlarındakı roluna görə Nobel sülh mükafatına irəli sürmək istəyir. Hindistan rəhbərliyi bunu oxşar addıma çağırış kimi qəbul edib. Elə həmin an Modi əsəbiləşib və cavabında vurğulayıb ki, ABŞ atəşkəs sazişinin bağlanmasında iştirak etməyib.

İki ölkə arasındakı münasibətlərin pisləşməsi təkcə bu səbəbdən deyil: ikitərəfli dialoqa ABŞ-ın Hindistandan idxala tətbiq etdiyi yüksək gömrük rüsumları, amerikalı rəsmilərin sərt bəyanatları, miqrasiya siyasətində dəyişikliklər və tələbə vizalarının verilməsinə yeni tələblər də mənfi təsir göstərir. Bu sonuncu məqam xüsusilə Hindistana ağır dəyib, çünki ABŞ-dakı bütün xarici tələbələrin dörddə biri hindistanlıdır.

İyulda baş tutan söhbətdən sonra Modi Trampın danışıqlar üçün bütün dəvətlərini rədd edib və G7 sammitindən sonra Vaşinqtona səfərdən imtina edib. NYT-nin mənbələri qeyd edir ki, ABŞ prezidenti də bu payız Hindistana səfər etməyi planlaşdırmır.

Ulusum.az