Azərbaycan İsrail xalqları arasında dostluq

İsrailin Afula şəhərində Azərbaycan əsilli şair Mixail Salmanın 75 illik yubileyi və azərbaycanlı rejissor Rüfət Əsədovun “Sevgimizin yolları” adlı sənədli filminin premyerası yüksək səviyyədə keçirilib.



Sənədli film, İsraildə yaşayan və Azərbaycan ilə İsrail xalqları arasında dostluq əlaqələrinin inkişafına verdikləri mühüm töhfələrlə tanınan Mixail və Yeganə Salmanın həyatından bəhs edir.



Tədbir, Diasporla İş üzrə Dövlət Komitəsinin dəstəyi ilə baş tutub və Afula Bələdiyyəsinin Absorbsiya İdarəsinin rəhbəri İnna Okun, Qiryat Yam şəhər merinin müavini, həmçinin “Azİz - İsrail və Azərbaycan Xalqlararası Əlaqə” Assosiasiyasının prezidenti Adam Amilov və digər qonaqların iştirakıyla keçirilmişdir.



İnna Okun, tədbirdə etdiyi təbrik nitqində Salman ailəsinin Afula şəhərinin mədəni həyatındakı əvəzolunmaz rolunu qeyd edib və şəhər rəhbərliyi adından yubilyara xatirə hədiyyəsi təqdim edib.



Adam Amilov da Mixail Salmanı 75 illik yubileyi münasibətilə təbrik edərək, Diasporla İş üzrə Dövlət Komitəsinin sədri Fuad Muradovun təbrik məktubunu və hədiyyəsini yubilyara təqdim edib.



Tədbirin ən maraqlı anlarından biri isə “Sevgimizin yolları” adlı sənədli filmin nümayişi oldu. Filmin izlənilməsi zamanı qonaqların böyük marağına və alqışlarına səbəb olub. Bu film yaxın zamanlarda Qüds şəhərində və bir sıra nüfuzlu kinofestivallarda da nümayiş olunacaq.



Qeyd edək ki, “Sevgimizin yolları” filminin rejissoru Rüfət Əsədov, Azərbaycanda doğulmuş və 60-dan çox bədii və sənədli filmin ərsəyə gəlməsində iştirak edib. Onun çəkdiyi filmlər bir çox mükafatlara layiq görülüb və müxtəlif kinofestivallarda nümayiş etdirilib.