Hələ də "RUS KOLBASASI"? - EKSKLÜZİV

Əsasən, qidalanmada ən çox üstünlük təşkil edən ayaqüstü qidalardan biri də kolbasalardır. Ət məhsullarının içərisində tez bir zamanda hazırlanan məhsullar insanların vaxtına və ağız dadına xidmət edir. Hazırda ölkədə 20-dən çox kolbasa istehsal edən şirkətlər var. Ancaq hələ də insanlar Rus kolbasası axtarır, onların keyfiyyətinə güvənir. Bəs buna səbəb nədir? Yerli istehsal olan kolbasalar nəyə görə bəyənilmir? Ulusum.az olaraq məsələni araşdırmağa çalışdıq. Mağazada çalışan əməkdaşlar bildirir ki, əvvəlki illər qədər olmasa da, indi də insanların bir qismi Rus kolbasası istəyir. Kolbasa şirkətlərinin birində menecer çalışan Ramil Hüseynov da Ulusum.az saytına özəl açıqlamasında bu barədə danışıb. R.Hüseynov etiraf edib ki, Rus kolbasasına olan tələbat hələ də qüvvədədir. O, bunun səbəbini illər öncə Rus kolbasasının brend ada çevrilməsi ilə əlaqələndirir:  “Düşünürəm ki, yerli kolbasa istehsalı ilə məşğul olan şirkətlərin bir çoxu yaxşı məhsul təqdim etməyə çalışırlar. Hətta istehsal olunan məhsulların keyfiyyəti olduqca yüksək qiymətləndirilir. Nəzərə alsaq ki, hazırda ölkəyə ötən illərə nisbətən az sayda Rus kolbasası ixrac olunur, ona görə yerli şirkətlərə bir qədər maraq artıb. Lakin bir çox mütəxəssis düşünür ki, yerli istehsal heç də zəif deyil. Yenə də qeyd edirəm, Rus kolbasasının illər öncə brendə çevrilməsi bu gün də yaddaşlarda qalıb”. Hazırda ölkəmizdə ət və ət məhsullarına böyük tələbat var. Bəzən istehsalçı şirkətlərin çoxu biri-biri ilə rəqabətdən çəkinmir. Lakin yerli və keyfiyyətli məhsulların özünü sübut etməsi üçün zaman lazımdır. Bəs sizcə yerli kolbasa, yoxsa xarici?  Ağa Dadaşzadə