Xüsusi təyinatlı şəhid Biləsuvarda dəfn edildi - VİDEO

Birinci Qarabağ müharibəsi zamanı Gəncə şəhər Şəhidlər xiyabanında dəfn olunan naməlum şəhid qəbirləri ekskumasiya edildikdən sonra kimliyi məlum olan şəhid İsaqov Elburus İsaq oğlunun hərbi qaydada dəfni keçirilib. Dəfn mərasimi Biləsuvar rayonu ərazisində yerləşən 3 saylı Cəbrayıl qaçqın qəsəbəsində baş tutub. Mərasimdə Cəbrayıl rayonunun icra hakimiyyətinin rəhbər heyəti, Müdafiə Nazirliyinin nümayəndələri, müharibə iştirakçıları, şəhid ailə üzvləri və ictimaiyyət nümayəndələri iştirak ediblər. Qeyd edək ki, Elburus İsaqov 1966-cı ilin 23 avqustunda Cəbrayıl rayonunun Böyük Mərcanlı kəndində doğulub. Əfqanıstan müharibəsinin iştirakçısı olan xüsusi təyinatlı Elburus Vətən müharibəsinin ilk illərindən düşmənə qarşı vuruşub. 1994-cü ilin fevralın 11-də Murovdağda, strateji Ömər aşrımı uğrunda döyüşlərdə şəhidlik zirvəsinə ucalıb. Ailədə 4 övlad olublar. Cəbrayıl işğal olunandan sonra Elburus İsaqovun ailə üzvləri Biləsuvarda yerləşən qaçqın düşərgəsinə yerləşib.
Şəhidin nəşi yaylım atəşi altında ana torpağa tapşırılıb. Ruhuna dualar oxunan şəhidin məzarı təzə-tər çiçəklərlə bəzədilib.