Sənə Gəlirəm, Tanrım

Yazar Fuad Cogitabad: Gənc ədəbiyyat nümayəndəsinin redaksiyamıza göndərdiyi şeirləri sizlərə təqdim edirik.


Sənə Gəlirəm, Tanrım

Hələ nələr var bu ürəyimdə,
Açılmamış xəzinələr, gizli yollar,
Daha nələr görəcək gözlərim,
Daha deyilməmiş sözlərim var.

Min il yaşasam boşalmaz içim,
Min il yaşasam bitməz sevgim.
Bəlkə hər əsr “sevgi” sözünü deyən mən idim,
Ayrı-ayrı bədənlərdə gəzən,
Ayrı-ayrı əsrlərdə yaşayan mən idim.

Gerçək olan hansı mən idim?
Dəryada damla idim,
Dağda diyirlənən daş idim,
Bəlkə əlində əsa,
Dənizi yaran Musa idim,
Ya oddan sağ çıxan İbrahim idim.

Kim idimsə –
Sevgi olaraq gəldim,
Bildiyim nə vardısa önümdə sərdim,
Yaxşı olan nə varsa dərdim,
Bar verdim, budağımı əydim.

Bir aciz vücudum var,
Unutdum onu –
Sevərkən unutdum
Nə olacaq sonu.
Dəli oldum, düşdüm çölə,
Amma unutmadım yolu.

Sənə gəlirəm, Tanrım,
Sev bu qulunu –
Sevginin yükü ilə gəlirəm,
Sevginin nəfəsi ilə gəlirəm
Sənə.

Ulusum.az