Ancelina Coli 50 yaşını səssiz qeyd etdi – “Artıq yalnız sülh istəyirəm”

Dünyaca məşhur aktrisa Ancelina Coli 50 illik yubileyini sakit və ailəvi bir ortamda qeyd edib. Qərb mətbuatının yazdığına görə, Coli son vaxtlar qalmaqallı şəkildə ayrıldığı sabiq əri Bred Pittdən sonra həyatında yeni və daha sakit bir dövrə qədəm qoyub.

People nəşrinin məlumatına görə, Coli böyük şənlik istəməyib:

“Bu, daha sakit, ailə içində keçiriləcək bir qeyd etmə olacaq.”

Mənbə bildirib ki, Coli bu yaş mərhələsini böyük pozitivliklə qarşılayır:

“O, 50 yaş ideyasını qəbul edir və heç vaxt olmadığı qədər özünü gerçək hiss edir. Anasının gənc yaşda vəfatından sonra o, qocalmağa başqa bir prizmadan yanaşır.”

Xatırladaq ki, Colinin anası Marşelin Bertran 56 yaşında xərçənglə mübarizədən sonra vəfat etmişdi. Coli isə anasının taleyini yaşamamaq üçün 2013-cü ildə profilaktik mastektomiya (süd vəzilərinin çıxarılması) və daha sonra yumurtalıqların götürülməsi əməliyyatını keçirmişdi.

İnsayderin sözlərinə görə, Coli bu günlərdə daha sakit, ilhamlı və gələcəyə ümidlə baxır:

“Ötən illər çətin olub, amma indi o, ən yaxşı dövrünü yaşayır. Ailə dramları da azalıb.”

Oskar, Toni və üç Qızıl Qlobus mükafatına layiq görülmüş Ancelina Coli həm də humanitar fəaliyyəti ilə tanınır. Onun Bred Pitt ilə olan 10 illik münasibətindən sonra cəmi iki il davam edən evliliyi 2024-cü ilin sonunda rəsmi boşanma ilə başa çatıb. Cütlüyün üçü bioloji, üçü isə övladlığa götürülmüş altı uşağı var.

Ulusum.az