Bu gün, 11:30 0 Sağlamlıq

Nutrisioloq faydalı və zərərli bişirmə üsullarını açıqladı

Qidanın bişirilmə üsulu onun tərkibindəki qida maddələrinin qorunmasına və ümumi sağlamlığa təsir edir. Bu barədə “Qazeta.Ru”ya “SM-Clinic”in həkim-terapevti, nutrisioloq Olqa Korxova danışıb.

Onun sözlərinə görə, ən sağlam üsullardan biri buxarda bişirmədir. Bu üsul zamanı qidalar su ilə təmas etmədiyi üçün vitamin və mineralların itkisi minimum olur.

“Bu, tərəvəzlərin və digər məhsulların parlaq rəngini, teksturasını və qida dəyərini qorumağa imkan verir. Buxarda bişirmə xüsusilə C vitamini və B qrupu vitaminləri kimi suda həll olan vitaminlərin saxlanılmasına kömək edir”, – deyə Korxova bildirib.

Tuşlama (öz suyunda bişirmə) da faydalı üsullardan sayılır. Məhsullar yavaş-yavaş, az miqdarda maye ilə bişdiyi üçün vitamin və minerallar daha yaxşı qorunur. Üstəlik, temperatur qızartmadan aşağı olduğu üçün qida maddələri daha yaxşı mənimsənilir.

Həkimin sözlərinə görə, qaynatma isə vitamin itkisinə səbəb ola bilər, çünki onlar suya keçir. İtkini minimuma endirmək üçün az su istifadə etmək və bişirmə müddətini qısaltmaq tövsiyə olunur. Əgər qaynadılmış su şorba və ya sous hazırlamaq üçün istifadə olunarsa, qida maddələrinin bir hissəsi qorunmuş olar.

Ən zərərli üsul kimi qızartma göstərilib. Çünki yüksək temperatur vitaminlərin məhv olmasına və zərərli birləşmələrin (məsələn, akrilamid) yaranmasına səbəb olur. Üstəlik, bu üsul bəzən zülalın mənimsənilməsini də zəiflədir.

“Sağlamlığı qorumaq üçün daha çox buxarda bişirmə və ya tuşlamaya üstünlük verilməli, qızartmadan isə az istifadə edilməlidir. Bişirmə üsullarının müxtəlifliyi isə vitaminlərin qorunmasına və balanslı qidalanmaya kömək edəcək”, – deyə mütəxəssis yekunlaşdırıb.

Ulusum.az

Diqqət Çəkənlər