Vitaminlər qazanda yoxa çıxmasın – buxarda bişirin!

Rasionunuzu daha sağlam etmək üçün pəhrizi tamamilə dəyişməyə ehtiyac yoxdur. Sadəcə bu sadə üsullarla sevdiyiniz yeməkləri daha faydalı edə bilərsiniz.

Sağlam qidalanma haqqında danışanda çoxlarının ağlına dərhal dadsız və solğun, qaynadılmış toyuq filesi və duzsuz qarabaşaqla dolu boşqab gəlir. Amma əslində, sevdiyiniz yeməkləri də sağlamlaşdırmaq mümkündür – həm də onların dadını korlamadan. Bu sadə tövsiyələri tətbiq edin və nəticəni özünüz görün!

1. Qızartma əvəzinə sobada bişirin

Tava yağında qızartma sağlam qidalanma üçün ideal üsul deyil – bunu demək olar ki, hamı bilir. Amma insan bəzən şirəli kotlet və ya qızarmış toyuq istəyir. Bu zaman onları tavada qızartmaq əvəzinə sobada bişirməyə çalışın. Beləliklə, həm istifadə etdiyiniz yağ miqdarını azaldacaqsınız, həm də vaxta qənaət edəcəksiniz. Çünki kotletləri soba listinə düzüb bişirmək, onları tək-tək tavada çevirməkdən qat-qat asandır.

2. Güveç yox, buxarda bişirin!

Güveç – yəni məhsulların uzun müddət rütubət və istilikdə bişməsi – qızartmadan daha sağlam sayılır. Amma bu proses zamanı bir çox faydalı maddələr sıradan çıxır. Ən yaxşısı, bu üsulu buxarda bişirmə ilə əvəzləməkdir. Beləliklə, vitaminlər qorunur, dad da qalır. Əgər buxar qazanınız yoxdursa, narahat olmayın – sadə bir süzgəci qazana yerləşdirib üzərinə qapaq qoymaqla da bu prosesi asanlıqla həyata keçirə bilərsiniz. Həm rahat, həm faydalı!

3. Tərəvəzləri bir qədər az bişirin

Tərəvəzlər nə qədər çox bişərsə, bir o qədər faydasını itirir – bu, elmi faktdır. Şorba bişirərkən, tərəvəz qovurması edərkən və ya omlet üçün bibər və pomidor hazırlayarkən onları tam yumuşalmayana qədər bişirməyə çalışın. Belə olduqda həm formalarını qoruyurlar, həm də qida dəyərləri daha çox qalır. Üstəlik, dadı da xoş olur!

4. Ət yerinə hinduşka istifadə edin

Əgər rasionunuzun kalori dəyərini azaltmaq istəyirsinizsə, mal ətini daha az yağlı hinduşka əti ilə əvəzləyə bilərsiniz. Hinduşka həm dadlı, həm də doyumludur. Onun lifli quruluşu donuz ətinə bənzər çeynəmə hissi verir. Bu əti şorbalarda, isti yeməklərdə və hətta qəlyanaltılarda da istifadə etmək olar.

5. Daha az duz, daha çox ədviyyat

Rasionunuzda duzun miqdarını azaltmaq istəyirsinizsə, amma yeməklərin dadsız olmasından qorxursunuzsa – ədviyyatlardan faydalanın. Lakin diqqət: bir çox qarışıq ədviyyatların tərkibində əsas komponent duz olur. Aldığınız ədviyyatın tərkibini yoxlayın – əgər siyahının ilk yerində “duz” yazılıbsa, deməli, onun tərkibində ən çox o var. Ən yaxşısı, ayrıca ədviyyatlardan (məsələn, qara istiot, zərdəçal, qırmızı bibər və s.) istifadə etməkdir – bunlar adətən duz ehtiva etmir.

İndi sağlam həyat tərzi sizə daha yaxın görünür, elə deyilmi?

Ulusum.az