Yay aylarında hansı içki daha çox sərinlədir? Suyun yerini nə tutur?

Yay aylarında artan temperaturla birlikdə orqanizmin maye tələbatı da əhəmiyyətli dərəcədə artır. Bu səbəbdən bir çox insan sərinləmək və susuzluğunu aradan qaldırmaq üçün müxtəlif içki seçimlərinə yönəlir. Bəs, hansı içki daha çox sərinlik və nəmləndirmə təmin edir? Budur təfərrüatlar...

Aparılan araşdırmalara görə, tam yağlı və yağsız süd ilə oral rehidratasiya məhlulları (bədəndəki maye çatışmazlığını aradan qaldırmaq üçün istifadə edilən məhlullar), sadə sudan daha çox nəmləndirmə qabiliyyətinə malikdir. Xüsusilə yağsız süd, sudan təxminən 339 qram daha artıq maye tutaraq ən yüksək nəmləndirmə indeksinə çatıb.

SÜD NİYƏ BU QƏDƏR EFFEKTİVDİR?

Araşdırmanın rəhbəri Dr. Ronald Maughan bildirib ki, südün tərkibindəki laktoz, protein və yağ mədənin boşalma sürətini yavaşlatdığı üçün, maye orqanizmdə daha uzun müddət qalır. O, həmçinin südün tərkibindəki natriumun sidik çıxışını azaltdığını da vurğulayıb.

Oxşar şəkildə, orta səviyyədə şəkər, natrium və kalium ehtiva edən oral rehidratasiya məhlullarının da orqanizmdə maye saxlanmasını effektiv şəkildə dəstəklədiyi qeyd edilib.

PORTAĞAL ŞİRƏSİ, QƏHVƏ VƏ SODA NƏ QƏDƏR EFFEKTİVDİR?

Araşdırmada portağal şirəsinin də ilk iki saat ərzində sudan daha yüksək nəmləndirmə təsiri göstərdiyi, lakin bu fərqin uzun müddətdə statistik baxımdan əhəmiyyətini itirdiyi qeyd olunub. Qazlı içkilərin isə istər adi, istərsə də dietik formalarının suya qarşı heç bir üstünlük yaratmadığı aşkar edilib.

Qəhvə və çay kimi kafeinli içkilərin az miqdarda istehlakı zamanı orqanizmdə maye itkisinə səbəb olmadığı, lakin 300 mq-dan artıq kafein qəbulunun (təxminən üç fincan qəhvə) maye itkisinin artması riskini yüksəltdiyi vurğulanıb.

ALKOQOLLU İÇKİLƏRƏ GƏLDİKDƏSƏ...

Tərkibində təxminən 4% alkoqol olan yüngül pivələrin sudan fərqli olaraq sidik çıxışında əhəmiyyətli artıma səbəb olmadığı, yəni bu cür içkilərin ölçülü şəkildə istehlakı zamanı ciddi maye itkisi riski yaratmadığı qeyd edilib.

Alimlər yay aylarında təkcə susuzluq hissinə güvənməmək, orqanizmin maye balansını qorumaq üçün xüsusilə süd və rehidratasiya məhlullarına üstünlük verilməli olduğunu tövsiyə edirlər.

Ulusum.az