Endometrioz – Səssiz ağrının adı

Bəzən bir qadının gülümsəməsinin arxasında gizlənmiş səssiz bir mübarizə olur. Endometrioz – qadınların həyat keyfiyyətini sarsıdan, lakin çox vaxt gec aşkarlanan və "adi sancı" kimi qəbul edilən bir xəstəlikdir.

Bu xəstəlik zamanı uşaqlıq daxili qişasına bənzər toxuma (endometrium) uşaqlıqdan kənar bölgələrdə – yumurtalıqlarda, bağırsaqlarda, bəzən isə qarın boşluğunda yerləşir. Aybaşı dövründə bu toxuma da qanayır, lakin çıxış yolu olmadığından orqanizmdə iltihab, yapışmalar və ağrılar yaradır. Nəticədə dözülməz sancılar, sonsuzluq, yorğunluq və həyat sevincini azaldan fiziki-emosional əzablar meydana çıxır.



Statistikaya görə, hər 10 qadından biri bu xəstəliklə üz-üzədir. Aybaşı zamanı şiddətli ağrılar, münasibətlər zamanı narahatlıq, xroniki yorğunluq varsa, bu siqnalları qulaqardına vurmaq olmaz. Çünki bu, sadəcə "aybaşı sancısı" deyil – bu, bədənin səssiz harayıdır.

Endometriozun diaqnostikası və müalicəsi çətin ola bilər, lakin mümkündür. Tez-tez müayinələr, düzgün hormon terapiyası və ehtiyac olduqda cərrahi müdaxilə ilə bu xəstəliyin təsirini azaltmaq və həyat keyfiyyətini yüksəltmək olar.

Qadın bədəni güclüdür – amma onun ağrısını ciddiyə almaq da bir o qədər vacibdir.

✍️"Ulusum".az