Pikassonun əsəri Belçikada ikinci əl mağazasında tapıldı

Antverpen, Belçika — Belçikanın Antverpen şəhərində yerləşən ikinci əl mağazada maraqlı və nadir bir sənət əsəri aşkarlanıb. Mağaza işçiləri ev əşyaları arasında ispan rəssamı Pablo Pikassonun orijinal keramika boşqabını tapıblar.

Hadisə ilk dəfə yerli HLN qəzeti tərəfindən işıqlandırılıb. Məlumata görə, tapıntı təxminən üç həftə əvvəl qeydə alınıb. Mağaza əməkdaşları boşqab üzərindəki “Empreinte originale de Picasso” yazısına diqqət yetiriblər. Əsərin orijinallığı daha sonra mütəxəssislər tərəfindən təsdiqlənib.

Boşqab üzərində Pikassonun məşhur mövzularından biri olan korrida — öküz döyüşlərinin eskizi təsvir olunub. Nadir sənət nümunəsi auksiona çıxarılıb və nəticədə 12,600 avroya satılıb.

Qeyd edək ki, bu, Kringwinkel zəncirinə daxil olan mağazaların ilk sənət əsəri kəşfi deyil. Daha əvvəl də Belçikalı rəssam James Ensorun əsəri burada tapılaraq Antverpen Kral İncəsənət Muzeyinə təqdim olunmuşdu.

✍️"Ulusum".az