Səma külə büründü: Kanlaon vulkanı təhlükəli mərhələyə keçir

Filippinlərin Neqros adasında yerləşən ən aktiv vulkanlardan biri olan Kanlaon yenidən püskürüb. Bu barədə ölkənin Vulkanologiya və Seysmologiya İnstitutu məlumat yayıb.

Rəsmi məlumata görə, püskürmə yerli vaxtla saat 02:55-də (Bakı vaxtı ilə 21:55) başlayıb və təxminən beş dəqiqə davam edib. Nəticədə, vulkanın üzərində güclü boz-ağ rəngli kül buludu əmələ gəlib, kül təxminən 4,5 kilometr yüksəklikdə havaya qalxıb.

Hava nəqliyyatına təhlükə səbəbilə aviasiya orqanlarına vulkan yaxınlığında uçuşlardan çəkinmək barədə tövsiyələr verilib, çünki kül təyyarə mühərrikləri üçün ciddi təhlükə yarada bilər.

Kanlaon ətrafında beş ballıq şkala üzrə üçüncü səviyyə vulkanik təhlükə elan edilib. Yerli əhaliyə kraterə 6 kilometrdən yaxınlaşmamaq və mümkün təxliyəyə hazır olmaq çağırışı edilib.

Turistlər arasında populyar olan Kanlaon vulkanının hündürlüyü 2400 metrdən çox, əsasının diametri isə 30 kilometrə çatır. Sonuncu dəfə bu il 8 aprel tarixində püskürmə qeydə alınmışdı.

✍️"Ulusum".az