İlham Əliyev: Azərbaycan və Türkiyənin birliyi türkdilli dünya üçün vacibdir

"Türkiyə və Azərbaycanın birliyi türk dünyasına çox böyük töhfə verir".

“Ulusum”.az "Anadolu"-ya istinadən xəbər verir ki, bunu İqdır-Naxçıvan qaz kəmərinin açılış mərasimində çıxışı zamanı Azərbaycan Prezidenti İlham Əliyev deyib.

İlham Əliyev qeyd edib ki, Türkiyə prezidenti Rəcəb Tayyib Ərdoğan “türk dünyasının birləşməsində böyük rol oynayır”.

Dövlət başçısı birgə neft-qaz kəməri layihələrinin iki ölkəni birləşdirdiyini, eyni zamanda Avrasiyanın enerji xəritəsini dəyişdiyini də vurğuladı.

İlham Əliyev xatırladıb ki, 1,5 il əvvəl Rəcəb Tayyib Ərdoğanla birlikdə İğdır-Naxçıvan qaz kəmərinin təməlini qoyublar.

İlham Əliyev bildirib ki, Azərbaycanın tarixi ərazisi olan Naxçıvan bir əsrdən artıqdır ki, ölkənin əsas hissəsindən ayrılıb və sovet administrasiyası Qərbi Zəngəzuru Azərbaycandan ayırıb Ermənistana verdiyinə görə heç bir quru əlaqəsi yoxdur.

Onun sözlərinə görə, bu haqsızlıq onun Naxçıvandakı soydaşlarının həyatına ağır təsir edib.

“I Qarabağ müharibəsi zamanı Ermənistan Naxçıvanı blokadaya aldı. Ermənilər Qarabağda olduğu kimi Naxçıvanı da işğal etmək istəyirdilər. O vaxt Naxçıvanın başçısı olan atam Heydər Əliyev buna imkan vermədi. Naxçıvanın işğal edilməməsinin səbəblərindən biri də Naxçıvanla Türkiyə arasında Ümid Körpüsünün tikintisi idi. Türkiyənin yardımı Naxçıvanın təhlükəsizliyinə mühüm töhfə verib”.

İlham Əliyev xatırladıb ki, iki qardaş ölkə olan Türkiyə və Azərbaycan nəhəng layihələr həyata keçirib: “Bakı-Tbilisi-Ceyhan, Bakı-Tbilisi-Ərzurum və TANAP kimi neft və qaz kəmərləri layihələri təkcə ölkələrimizi birləşdirməyib, həm də Avrasiyanın enerji xəritəsini dəyişib”.

Azərbaycandan Türkiyə üzərindən gələn qazın bir çox ölkələrin enerji təhlükəsizliyini təmin etdiyini qeyd edən Əliyev əlavə edib: “Ötən il Azərbaycandan qaz ixracı 25 milyard kubmetrə çatıb. Bu həcmin yarısı Türkiyəyə ixrac edilir. Türkiyədən başqa 10 Avropa ölkəsi də enerji təhlükəsizliyini Azərbaycan qazı ilə gücləndirir”.

İlham Əliyev bəyan edib ki, İğdır-Naxçıvan qaz kəmərinin təntənəli açılışı Naxçıvanın enerji təhlükəsizliyini təmin edəcək, Azərbaycandan Türkiyəyə, oradan da Naxçıvana ötürülən qaz enerji problemini həll edəcək.

- "Cənab Ərdoğan türk dünyasının birləşməsində böyük rol oynayır"

Prezident Əliyevin sözlərinə görə, Türkiyə və Azərbaycanda həyata keçirilən enerji layihələri nəqliyyat layihələrinin həyata keçirilməsi üçün də imkanlar yaradır.

“Türkiyəni Azərbaycanla birləşdirən Bakı-Tbilisi-Qars dəmir yolu həm ölkələrimizə, həm də bütövlükdə bütün coğrafiyaya böyük üstünlüklər verir. Bu nəqliyyat əlaqəsi xüsusilə türk dünyasının birləşməsi üçün böyük əhəmiyyətə və faydaya malikdir. Təbii ki, Türkiyə ilə Azərbaycan arasındakı birlik, qardaşlıq türk dünyasına böyük töhfədir. Cənab Ərdoğan türk dünyasının birləşməsində böyük rol oynayır. Onun rəhbərliyi ilə Türkiyədə böyük uğurlar qazanılmış, türk dünyasının daha da birləşməsi üçün yeni imkanlar yaradılmışdır. Azərbaycan türk dünyasının birləşməsinə hər zaman böyük önəm verib və bu birliyin təmin olunması, onun əbədi olması, ortaq tarixə, ortaq maraqlara əsaslanan münasibətlərin qurulması üçün səylərini əsirgəməyib”.

Əliyev Naxçıvanda 500 min soydaşımızın bugünkü mərasimi bayram kimi qəbul etdiyini qeyd edib, İğdır-Naxçıvan qaz kəmərinin çəkilişində əməyi olanlara təşəkkür edib.