"Sərhəd problemi həll edilməsə..." - Liderdən Ərdoğana MESAJ

Yunanıstanla Türkiyə arasında dəniz sərhədləri ilə bağlı mübahisələr hətta konkret irəliləyiş olmasa belə, sivil formatda həll edilməlidir.

Ulusum.az xəbər verir ki, bunu Yunanıstan Baş naziri Kiriakos Mitsotakis deyib.

"Biz bunu indiki, xüsusən də qlobal qeyri-müəyyənlik, çoxşaxəli böhran və təlatüm dövründə gərginlik olmadan həll etməyi xalqlarımıza borcluyuq. Egey və Şərqi Aralıqda dəniz sərhədlərinin müəyyən edilməsi məsələsində irəliləyiş əldə edə bilməsək belə, mübahisəmiz sivil qaydada olmalıdır. Ümid edirəm ki, xalqlarımız arasında əlaqələr daha da möhkəmlənəcək və bu, Egey dənizinin hər iki sahilindəki hökumətlərdən asılı olmayacaq. Ümid edirəm ki, dəniz sərhədləri ilə bağlı fikir ayrılıqlarımızı həll edə bilərik", - Mitsotakis vurğulayıb.

Həmçinin o, iki ölkənin yaxın 10 ildə bu problemi həll edib-edə biləyəcəyi ilə bağlı suala dəqiq cavab verməyib.

Baş nazir ümid edir ki, sərhəd problemi həll olunmasa belə, 10 ildən sonra iki ölkə gərginliksiz və böhransız, dürüstlük, qarşılıqlı hörmət və anlaşmaya əsaslanan münasibətlərdə yeni səhifə açacaq. O, həmçinin Türkiyə-Yunanıstan münasibətlərinin yaxşılaşmasının Kipr məsələsi üzrə danışıqların bərpasına gətirib çıxaracağına ümid etdiyini də söyləyib.

Mitsotakis əlavə edib ki, ölkələr əməkdaşlıq üçün böyük potensiala malikdir, eyni zamanda həm ikitərəfli, həm də beynəlxalq səviyyədə razılaşdırılmayan məsələlər var. Onun sözlərinə görə, hətta dostlar da həmişə ortaq mövqelərə malik deyillər, ancaq bu, əməkdaşlıq variantlarının tapılmasına mane olmamalıdır.