Arəstə Baxışovanın DOĞUM GÜNÜDÜR!

Bu gün torpaq uğrunda mübarizədə canını fəda edən, şəhidlik məqamına ucalmaqla ölümsüzləşən 44 günlük Vətən müharibəsinin ilk və yeganə xanım şəhidi, hərbi tibb qulluqçusu Arəstə Baxışovanın doğum günüdür.
Ulusum.az xəbər verir ki, o, Vətən yarasına məlhəm olan kişi qeyrətli AZƏRBAYCAN xanımı kimi tarixə düşdü...

Çavuş Arəstə Baxışova Vətən müharibəsinin qızğın günlərində Füzulinin, Zəngilanın və Qubadlının azadlığı uğrunda gedən döyüşlərdə yaralı hərbçilərə ən qaynar nöqtədə, elə döyüş meydanında tibbi yardım göstərib. O, 1 aya qədər müddətdə kişilərlə çiyin-çiyinə səngərdə, meşədə yaralılara yardım edib. Başına güllə yağa-yağa yaralanan hərbçi qardaşlarını böyük əziyyətlə atəş altından çıxarıb, neytral əraziyə gətirib..

Arəstə oktyabrın 23-də Qubadlı döyüşləri zamanı yaralı zabiti döyüş meydanından çıxararkən şəhidlik məqamına yüksəlib. Beləliklə, onun son iş yeri Vətən savaşının ən qaynar nöqtələri olub. O, Biləcəri qəsəbəsinin Şəhidlər xiyabanında dəfn olunub. Ölümündən sonra “Vətən uğrunda” medalı və Beynəlxalq Qırmızı Xaç Komitəsi tərəfindən ingilis tibb bacısı Florens Naytingelin şərəfinə təsis olunan “Florence Nightingale” medalı ilə təltif edilib.

Vətən səni unutmayacaq. Ruhun şad olsun!