ABŞ-da azyaşlılara "kredit" verildi: Şok edici faktlar

ABŞ-da Dövlət İdarəetmə Effektivliyi Departamenti (DOGE), milyarder İlon Maskın rəhbərlik etdiyi qurum, X sosial şəbəkəsində verdiyi açıqlamada, Kiçik Biznes İdarəsinin (SBA) uşaqlara 312 milyon dollar məbləğində kredit verdiyini bildirib.

“Ulusum”.az-ın məlumatina görə, bəyanatda qeyd edilir ki, bu hadisə 2020-2021-ci illərdə baş verib.

"Kiçik Biznes İdarəsi 11 yaş və ya daha kiçik yaşda olan sahibkarların adı ilə qeyd olunan 5,593 kredit verib, ümumi məbləğ isə 312 milyon dollar olub", — deyə postda qeyd edilib.

Departament, belə bir yaşda olan şəxslər üçün biznes razılaşmalarının mümkün ola biləcəyini etiraf etsə də, bütün 5,5 min əməliyyatın bu kateqoriyaya düşəcəyindən şübhələndiklərini bildirib. Həmçinin, bəzi hallarda sənədlərdə səhv adlar göstərilib. DOGE və SBA bu problemi həll etməyə çalışır.

Xatırladaq ki, dörd gün əvvəl məlum olub ki, ABŞ Kiçik Biznes İdarəsi iki il ərzində 333 milyon dollar məbləğində kreditləri 115 yaşdan yuxarı şəxslərə verib. Məsələn, 36 min dollar kredit alan şəxsə 157 yaşında olduğu bildirilmişdi.