Çində, 35 nəfərin ölümünə və 43 nəfərin yaralanmasına səbəb olan şəxs haqqında verilmiş ölüm hökmü icra edilib

Çində, 2024-cü ilin noyabrında Çjuxay şəhərində insanların üzərinə sürərək 35 nəfəri öldürən və 43 nəfəri yaralayan kişinin ölüm hökmü icra edilib.

“Ulusum”.az xəbər verir ki, Çin Mərkəzi Televiziyasının məlumatına görə, hadisə şəhərin idman mərkəzində fiziki məşqlərlə məşğul olan şəxslərin üzərinə avtomobillə hücum zamanı baş verib.

Çinin Guangdong əyalətinin Çjuxay şəhər orta xalq məhkəməsi 20 yanvar tarixində, Ali Xalq Məhkəməsinin qərarına uyğun olaraq, Fan Veyçunun ölüm hökmünü icra edib.

62 yaşlı sürücü hadisə yerindən qaçmağa çalışarkən polis tərəfindən saxlanılıb. Məhkəmə zamanı məlum olub ki, təqsirləndirilən şəxs boşanma, əmlak bölgüsündən narazılıq və "həyatdan ümumi məyusluq" səbəbindən güclü emosional vəziyyətdə olub və bu səbəblə aqressiyasını tökmək üçün insanlara qarşı belə bir hərəkət edib.


Səidə Mustafa