Ərdoğandan məhkəmə zəfəri: CHP lideri 75 min lirə təzminat ödəyəcək

Türkiyə siyasətində sözün gücü bir daha gündəmdədir. Prezident Rəcəb Tayyib Ərdoğan, Cümhuriyyət Xalq Partiyasının (CHP) lideri Özgür Özelə qarşı açdığı məhkəmə prosesində qalib gəlib. Məhkəmənin qərarına əsasən, Özel prezidentə 75 min türk lirəsi (təxminən 3347 manat) məbləğində mənəvi təzminat ödəməli olacaq.

“Ulusum”.az xəbər verir ki, bu barədə Ərdoğanın vəkili Hüseyn Aydın “X” sosial şəbəkəsində məlumat paylaşıb.

İşin səbəbi isə 2022-ci ilin aprelində, Çağlayan Ədliyyəsi qarşısında Özgür Özelin Ərdoğanı məhkəmə sisteminin müstəqilliyini pozmaqda ittiham etdiyi çıxışı olub. Məhkəmə həmin sözlərin prezidentin şəxsiyyətinə qarşı hücum olduğunu əsas gətirərək Özelin cərimələnməsinə qərar verib.

Amma bu iş hələ son deyil. Ərdoğan yaxın günlərdə daha bir təzminat iddiası ilə çıxış edib. Səbəb? CHP-nin qurultayında Özelin prezidentə "xunta lideri" deyə müraciət etməsi. Bu dəfə prezidentin tələb etdiyi təzminat məbləği 500 min lirədir.