Uitkof Ukraynanın seçkiləri ilə bağlı mövqeyini açıqlayıb

“Ulusum”.az xarici mətbuata istinadən xəbər verir ki, ABŞ Prezidenti Donald Trampın xüsusi nümayəndəsi Stiv Uitkof cümə axşamı günü "Fox News"un keçmiş aparıcısı Taker Karlsonla müsahibəsində Ukraynanın prezident seçkiləri keçirmək barədə razılığa gəldiyini iddia edib. Lakin bu iddianı dəstəkləyən konkret sübutlar təqdim etməyib.

Tramp administrasiyası, Ukraynada müharibə vəziyyətində olmasına baxmayaraq, ölkədə seçki keçirilməsi üçün təzyiqləri artırır. Bu, Ukraynanın konstitusiyasına ziddir, çünki müharibə şəraitində seçkilərin keçirilməsi qadağandır. ABŞ Prezidenti Volodimir Zelenskini "seçkisi olmayan diktator" adlandıraraq Ukrayna rəhbərliyinin legitimliyini şübhə altına alıb.

Tənqidçilər, müharibə şəraitində keçiriləcək seçkilərin Ukraynanı Rusiya qarşısında daha da zəiflədəcəyini və özünümüdafiə qabiliyyətini çətinləşdirəcəyini bildirirlər.

Bundan başqa, Uitkof Ukraynanın NATO üzvlüyü məsələsinə də münasibət bildirib. O, Rusiya'nın bu məsələni ciddi şəkildə qarşı çıxdığını qeyd edib və əlavə edib ki, əgər sülh müqaviləsi imzalanarsa, Ukrayna NATO üzvü ola bilməz. "Məncə, bu artıq əsasən qəbul edilib. Belə bir seçim yoxdur", – deyə Uitkof vurğulayıb.

Lakin, o həmçinin qeyd edib ki, Ukrayna NATO üzvü olmasa belə, alyans ölkələrinə təklif edilən təhlükəsizlik zəmanətləri kimi müdafiə təminatları ala biləcək. "Bu, müzakirə üçün açıqdır", – deyə Uitkof əlavə edib.