Dünya texnoloji inqilab astanasındadır – cəmi 2-5 nəfərlə şirkətlər idarə olunacaq

Şəxsi iqtisadi proqnozları ilə tanınan isveçli futurist və biznes eksperti Kjelle A. Nordström bildirib ki, dünya texnoloji inqilabın astanasındadır – artıq cəmi iki-beş nəfərlik komandalar robotlaşdırılmış sistemlər sayəsində böyük şirkətləri idarə edə biləcəklər.

Bakıda keçirilən 30-cu Enerji Forumunda çıxış edən Nordström qeyd edib ki, avtomatlaşdırmanın yeni dalğası artıq inzibati sektor və xidmət sahəsini də əhatə etməyə başlayıb.

“Təsəvvür edin, cəmi 2-5 nəfərlə nəhəng müəssisələr və otellər idarə olunur. Sadəcə maşınlar vasitəsilə. Çünki bütün biliklər proqramlara inteqrasiya olunacaq – artıq bu işlər üçün ixtisaslı insanlara ehtiyac qalmayacaq. Bu proses artıq sənayedə başlayıb və indi idarəetmə və bürokratiya sahəsinə doğru gedir”, – deyə ekspert bildirib.

O, ənənəvi təhsil sisteminin də böhran yaşadığını vurğulayıb: “Tədris proqramları köklü şəkildə yenidən qurulmalıdır. Professorlar artıq biliyə deyil, bacarıqlara fokuslanmalıdır.”

Bütün bu radikal dəyişikliklərə baxmayaraq, Nordström iqtisadi gələcək baxımından nikbindir. Onun sözlərinə görə, “pul yox olmayacaq” – sadəcə ölkələr fərqli üsullarla rəqabət aparacaqlar.

Ulusum.az