Samsung-dan süni intellektli qatlana bilən “Galaxy Ultra” gəlir

“Samsung” korporasiyası yaxın zamanda “Galaxy Ultra” seriyasına daxil olacaq yeni qatlana bilən smartfonun təqdimatını elan edib. Bu barədə şirkətin rəsmi saytında yayımlanan press-relizdə qeyd olunub. Bildirilir ki, yeni cihaz geniş ekranlı olacaq və Ultra seriyasının bir hissəsini təşkil edəcək.

Şirkət nümayəndələri bu seriyaya marağın artdığını bildirərək, istifadəçilərə sadəcə texniki göstəricilərin yaxşılaşdırılmasından daha üstün bir təcrübə təqdim etməyə çalışdıqlarını vurğulayıblar. Yeni flaqmanın konkret adı və texniki xüsusiyyətləri hələ açıqlanmasa da, cihazın yüngül korpuslu və kompakt dizaynda olacağı bildirilib.

Şirkətin təqdim etdiyi qısa videoda smartfonun qatlanmış halda uzunsov, düzbucaqlı forma alacağına işarə edən konturlar yer alıb. Həmçinin, cihazın süni intellekt alətləri ilə işləməyə dəstək verəcəyi də qeyd olunub.

Hazırda Samsung-un məhsul çeşidində qatlana bilməyən “Ultra” seriyası smartfonlar da mövcuddur. Məsələn, fevral ayında təqdim olunan Galaxy S25 Ultra 6,9 düymlük ekran, Snapdragon 8 Elite prosessor və dörd kameralı sistemlə təchiz olunmuşdu.

Ulusum.az