Faiq Ağayev küsülü olduğu Brilliant Dadaşovadan danışdı

Xalq artisti Faiq Ağayev illərdir küsülü olduğu həmkarı Brilliant Dadaşovadan danışıb.

Müğənni "Xəbərin var?" verilişində Dadaşovaya bir daha barışıq addımı atıb:

"İnsanlar var ki, onların ulduzları heç cürə barışmır. Dəfələrcə demişəm, həm sənətdə, həm bir qadın, ana, həyat yoldaşı, həm də kiminsə rəfiqəsi və dostu kimi bütün yolları hamar, gözəl, uğurlu olsun. Gümüş dalınca gedib, qızıl tapsın. Bunu səmimi qəlbdən, sidq ürəkdən arzulayıram. Çünki mənim Brilliant Dadaşova ilə bağlı həyatımda bir dirəniş nöqtəm yoxdur. Çox dibinə kimi getsək, bizim bir düşmənimiz var. Ona da qalib gəldik, başına yumruq vurduq".

F.Ağayev bildirib ki, dadaşovun oğlu Cahadın toyunda mahnı oxumağı belə düşünür:.

"Brilliant heç zaman düşmənim ola bilməz. Çünki o mənim öz millətimdən, canımdandır. Ulduzlarımız barışmır, amma bu faciə deyil. Bu o demək deyil ki, dayanmadan Brilliant məni, mən də onu söyməliyəm. Bu çox ayıb olar. İlk əvvəl bu sənətə vurulan zərbədir. Çünki biz bir-birimizlə belə münasibətdə olanda kənardan “Bu sənətdə olanlar hamısı zaydır” deyirlər və ümumilləşdirib sənəti vururlar. Bu sənətdə peşəkarları qorumaq kimi vəzifəm var mənim. Heç zaman bu sənətin yaxşısını vurmaram. Heç pisini də vurmaram, sadəcə ondan danışmaram.

Amma yaxşı sənətçini vurmaq olmaz. Brilliantın oğlunun toyu olsa, gedib orada çıxış edərəm. “Cavad” adlı bir mahnım var. Onu dəyişib “Cahad” edib, oxuyaram".

Qeyd edək ki, B.Dadaşova və F.Ağayev illərdir küsülüdür. Onlar dəfələrlə bir-birinin ünvanına qalmaqallı sözlər deyib.