30-07-2025, 14:00 0 Cəmiyyət / Şou-biznes

Məşhur aktrisa:“Gündə bir əsas yemək və hərəkət – sağlamlığımın sirri!” - FOTO

74 yaşlı britaniyalı aktrisa Ceyn Seymur sağlam həyat tərzi ilə bağlı açıqlamalar verib. DailyMail.com-a danışan Seymur bu yaşda belə sağlam və formada qalmağının sadə bir qayda sayəsində mümkün olduğunu bildirib.

Bu yay İrlandiyada "Harry Wild" serialının beşinci mövsümünü çəkəcək olan gözəl aktrisa gündə yalnız bir əsas yemək yediyini deyib. Seymur pəhriz saxlamadığını, lakin gündə üç dəfə də yemədiyini söyləyib. O, əsas yeməyini saat 13:30 radələrində yediyini və günə necə başladığını belə izah edib:

“Günə protein almaq üçün qəhvə və qaynadılmış yumurta ilə başlayıram. Günorta yeməyinə qədər tam yemək yemirəm, çünki yalnız həmin vaxt onu həqiqətən dada bilərəm.”

Formda göründüyünü sübut edən mayo şəkillərini də paylaşan məşhur aktrisa təzə qidaların istifadəsinin vacibliyini vurğulayıb:

“Balıq və tərəvəzləri sevirəm. Arxa həyətimdə tez-tez istifadə etdiyim bir çox yaşıl göyərti yetişdirirəm. Aralıq dənizi mətbəxinə heyranam – çox dadlı və zəngindir: pomidor, zeytun, balıq və başqa bir çox ləzzətli məhsullar.”

İngilis aktrisası günün sonrakı saatlarında fıstıq kimi çərəzlər, xiyar, kərəviz və humusla atışdırmalara üstünlük verdiyini deyib.

Formasını necə qoruduğunu da izah edən Seymur qeyd edib ki, yüngül çəkilər qaldırır və pilateslə məşğul olur.

“Hərəkət etməyə davam etməlisiniz”, – deyə aktrisa bildirib.

Məhəbbət həyatı ilə bağlı da danışan məşhur aktrisa musiqiçi Con Zambetti ilə münasibətdə olduğunu bildirib:

“Sevgi üçün açıq olmalı və xoşbəxt olmalısınız. 50 yaşdan yuxarı olmaq həyatınızın bitməsi demək deyil. Bu, yeni bir səyahətə başladığınız, yeni şeylər tapdığınız dövrdür. Yeni hobbilər və münasibətlər qurmaq çox maraqlı ola bilər. Bu, insanın inkişafı üçün ən doğru zamandır, çünki artıq çətinliklərin çoxunu arxada qoymusunuz.”