Monika Belluççi yeni Butterfly Jam-da

Fransada, Sen-Pol-sür-Mer şəhərindəki Prijan parkında məşhur aktrisa Monika Belluççi, Kantemir Balagovun "Kəpənək mürəbbəsi" (orijinal adı — Butterfly Jam) adlı yeni filminin çəkilişləri zamanı görüntüləndi. Bu barədə DeltaFM saytı məlumat yayıb.

Məlumatlara görə, Belluççi layihənin son çəkiliş günündə epizodik rolda iştirak edib. Filmin premyerası 2026-cı ildə, ehtimal ki, Kann Film Festivalının müsabiqə proqramında gözlənilir.

Qeyd edək ki, Balagov aprelin 7-də sosial şəbəkələrdə artıq çəkilişlərə başladığını açıqlamışdı. Filmin aktyor heyətində "İnişerin Bansiləri" filmindən tanıdığımız Barri Keoqan, "Çılğın Maks: Qəzəb yolu" filmindən Rayli Kio və "Harri Potter" filmlərində Dadli Darsli rolunu canlandıran Harri Melling də yer alır.

Film ingilis dilində çəkilir və Nyu-Cersidə yaşayan kəbardin mühacirlərin cəmiyyətində ata və oğul münasibətlərinə həsr olunur.

Xatırladaq ki, Kantemir Balagov 2017-ci ildə "Təngnəfəslik" filmi ilə rejissor kimi debüt etmişdi. Həmin film Kann Festivalında nümayiş olunmuş və "Xüsusi baxış" proqramında FİPRESİ beynəlxalq kino tənqidçiləri mükafatını qazanmışdı.

Ulusum.az