Maskla Putin arasında müntəzəm ünsiyyət olduğu məlum olub

Amerikalı milyarder İlon Mask 2022-ci ilin sonundan etibarən Rusiya prezidenti Vladimir Putinlə mütəmadi olaraq əlaqə saxlayır, onlar “şəxsi mövzuları, biznes və geosiyasi gərginliyi” müzakirə edirlər. Bu barədə “The Wall Street Journal” mənbələrə istinadən yazıb.

Nəşr yazır ki, ABŞ hökuməti bundan xəbərdardır, lakin danışıqları gizli saxlayır. Mask Putindən başqa, onun administrasiyasının rəhbəri Sergey Kiriyenko ilə də danışıb. 2022-ci ilin payızında politoloq Yan Bremmer bildirmişdi ki, Mask ona Putinlə söhbəti və Kremlin “qırmızı xətləri” haqda danışıb – Putin “nəyin bahasına olursa olsun” Krımı və Ukraynanın neytrallığını qorumaq niyyətindədir.

Həmçinin 2023-cü ilin sonunda Kreml Maskdan Si Cinpinə “lütf” olaraq Tayvan üzərində Starlink-i işə salmamağı xahiş etdi. WSJ yazır ki, Maskın gizli danışıqları Trampın Rusiya Federasiyası ilə, o cümlədən Ukrayna ilə bağlı genişmiqyaslı saziş bağlamaq istəyini təsdiqləyə bilər.

Eltun Məmmədov