Kabildə Əfqanıstan-Özbəkistan-Azərbaycan üçtərəfli görüşü keçirilib

Kabildə Əfqanıstan-Özbəkistan-Azərbaycan üçtərəfli görüşü keçirilib.

İRNA xəbər verib ki, Əfqanıstanın Sənaye və Ticarət Nazirliyi Kabildə Əfqanıstan, Özbəkistan və Azərbaycan arasında üçtərəfli görüşün keçirildiyini açıqlayıb.

Məlumata görə, görüş Əfqanıstanın sənaye və ticarət naziri vəzifəsini icra edən Nurəddin Əzizi, Özbəkistanın sənaye, ticarət və investisiyalar naziri Ləziz Qüdrətov və Azərbaycanın iqtisadiyyat nazirinin müavini Sahib Məmmədovun iştirakı ilə baş tutub.

Bildirilib ki, tərəflər Əfqanıstanın şimalında ticarət, investisiya, nəqliyyat və logistika sahələrində əməkdaşlığın inkişafı, geoloji fəaliyyət və mədən kəşfiyyatı, regional əməkdaşlıq, yeni İpək Yolu marşrutundan effektiv istifadə, dəmir yolu xətləri və Əfqanıstanın İqtisadi Əməkdaşlıq Təşkilatında yenidən fəal iştirakını müzakirə ediblər.

Qeyd olunub ki, tərəflər oxşar görüşlərin və qeyd olunan bütün sahələrdə əməkdaşlığın davam etdirilməsi barədə razılığa gəliblər.

Eltun Məmmədov