Mingəçevirdə “8 Noyabr” Stansiyası Açıldı

Mingəçevirdə “8 Noyabr” elektrik stansiyasının açılış mərasimi keçirilir. Tədbirdə çıxış edən Prezident İlham Əliyev, bu hadisənin ölkənin enerji potensialını daha da gücləndirəcəyini bildirib:

“8 Noyabr” elektrik stansiyasının açılışı ölkəmizin enerji potensialını əhəmiyyətli dərəcədə artıracaq əlamətdar bir hadisədir. Bu stansiyanın qısa müddətdə tikilib istifadəyə verilməsi, energetika sahəsindəki gücümüzü, potensialımızı, təcrübəmizi və peşəkarlığımızı bir daha nümayiş etdirir.”

Prezident qeyd edib ki, hazırda Azərbaycanın elektrik enerjisinin 40%-dən çoxu məhz Mingəçevirdə istehsal olunur. Yeni stansiya isə bu potensialı daha da artıracaq:

“Bu stansiya enerji sisteminin səmərəliliyini artıracaq və Mingəçevirin təkcə Azərbaycanın deyil, bütün Cənubi Qafqazın enerji mərkəzi kimi mövqeyini daha da möhkəmləndirəcək.”

İlham Əliyev onu da bildirib ki, son 20 ildə Azərbaycanda enerji sistemi faktiki olaraq sıfırdan qurulub. Ölkənin müxtəlif bölgələrində yeni elektrik stansiyaları inşa edilib, Mingəçevirdə isə həm tikinti, həm də rekonstruksiya işləri aparılıb.

“Mingəçevir hər zaman enerji mərkəzi olub. Burada formalaşmış güclü kadr potensialı Azərbaycanın uğurlarına zəmin yaradır.”

Ulusum.az