Bakıda Ticarət Canlanır – 5 Ayda 13,7 Milyardlıq Satış

Bu ilin yanvar-may aylarında Bakı şəhərində pərakəndə ticarət dövriyyəsi ötən ilin eyni dövrü ilə müqayisədə 4,7 % artaraq 13 milyard 761,5 milyon manata çatıb. Bu barədə Bakı Şəhər Statistika İdarəsi məlumat yayıb.

Ərzaq məhsulları, içkilər və tütün məmulatlarının dəyəri 5,7 % artaraq 7 milyard 508,1 milyon manat, qeyri-ərzaq məhsulları üzrə isə artım 3,8 % olub – bu sahədə dövriyyə 6 milyard 253,4 milyon manata yüksəlib.

Müəssisələr üzrə satış 7,5 %, fərdi sahibkarlar və bazarlarda isə 3 % artım göstərib. Beləliklə, istehlak məhsullarının:

39,6 %-i hüquqi şəxslərə məxsus ticarət obyektlərində,

51,6 %-i fərdi sahibkarların mağazalarında,

8,8 %-i isə paytaxtın məhsul bazarlarında satılıb.

Ümumilikdə, ölkə üzrə pərakəndə satış dövriyyəsi bu ilin ilk beş ayında 23 milyard 341,3 milyon manat təşkil edib. Onun:

13 milyard 73,4 milyon manatı ərzaq məhsulları, içkilər və tütün məmulatları,

10 milyard 267,9 milyon manatı isə qeyri-ərzaq mallarının satışına aiddir.

Bu da onu göstərir ki, Azərbaycanda istehlak bazarında 3,8 % real artım müşahidə olunur. Ərzaq üzrə artım 1,6 %, qeyri-ərzaq üzrə isə 6,5 % təşkil edib.

Ulusum.az