ABŞ-ın idxal rüsumları qalmaqalında yeni dönüş

ABŞ digər ölkələrə qarşı cavab rüsumları tətbiq etmək imkanına sahib olmadıqda, “iqtisadi olaraq sağ qalmaq şansı” yoxdur. Bu fikri ABŞ-ın prezidenti Donald Tramp “Truth Social” sosial şəbəkəsində bildirib.

Siyasətçi qeyd edib ki, əgər digər ölkələrə ABŞ-a qarşı rüsum tətbiq etmək icazə verilirsə, lakin Vaşinqton onlara qarşı tez və çevik şəkildə cavab rüsumları tətbiq edə bilmirsə, o zaman ABŞ-ın iqtisadi sağ qalmaq üçün heç bir şansı qalmır.

2 aprel tarixində Tramp 185 ölkədən idxal edilən mallara yeni rüsum sistemi tətbiq edib. Baza rüsum faizi bütün məhsullara 10% müəyyən edilib, bəzi ölkələr üçün isə bu rəqəm daha yüksək olub. Dünyadakı ölkələrin liderləri Trampın bu qərarını pisləyərək cavab addımları ilə hədələyiblər. Lakin 29 mayda ABŞ Beynəlxalq Ticarət Məhkəməsi Trampın tətbiq etdiyi rüsumları bloklayıb və bildirib ki, siyasətçi səlahiyyətlərini aşmışdır. Ancaq qısa müddət sonra apellyasiya məhkəməsi bu qərarın icrasını dayandırıb.

Ulusum.az