Tekstil Sənayesinin Gələcəyi Müzakirə Olundu👗

2025-ci il aprelin 24-də Azərbaycan Tekstil İstehsalçıları və İxracatçıları Assosiasiyası ilə tekstil sənayesinin inkişaf perspektivlərinə dair görüş keçirilib. İqtisadiyyat Nazirliyinin dəstəyi və AZPROMO-nun təşkilatçılığı ilə baş tutan tədbirdə sənayenin dayanıqlı inkişafı və ixrac potensialının artırılması məsələləri müzakirə olunub.

Görüşdə iqtisadiyyat nazirinin müavini Səməd Bəşirli, AZPROMO-nun icraçı direktoru Yusif Abdullayev və Assosiasiyanın icraçı direktoru Fəridə Axundova çıxış edərək, tekstil sahəsində rəqabətqabiliyyətli və yüksək əlavə dəyərli məhsul istehsalının əhəmiyyətini vurğulayıblar. İştirakçılar, həmçinin, tekstil sənayesində klasterləşmə və beynəlxalq əməkdaşlıq imkanlarını da müzakirə ediblər.

Qeyd edək ki, Azərbaycan Tekstil Assosiasiyası 2018-ci ildə yaradılıb və ölkənin tekstil sektorunun inkişafına dəstək göstərmək məqsədilə fəaliyyət göstərir. Assosiasiya, yerli təcrübələri beynəlxalq standartlara uyğunlaşdırmaq və tekstil məhsullarının ixrac potensialını artırmaq üçün müxtəlif təşəbbüslər həyata keçirir .

✍️"Ulusum".az