"Supermen olmadığımı gördüm" – Acun Ilıcalı Fenerbahçəyə vida sonrası ilk dəfə danışdı

Fenerbahçənin sabiq vitse-prezidenti, tanınmış media adamı Acun Ilıcalı, vəzifədən ayrıldıqdan sonra ilk dəfə açıqlama verdi.

İngiltərənin Hull Daily Mail nəşrinə danışan Ilıcalı, Fenerbahçədəki vəzifəsindən sonra artan iş yükünə diqqət çəkdi.

"Supermen olmadığımı anladım"

"Fenerbahçədə bir il boyunca məsuliyyət daşıdım və bununla qürur duyuram. Dominikan Respublikası və İstanbulda işləri olan bir iş adamı olaraq Hull City-ni satın aldıqdan sonra hər şeyi təşkil edə bildim, lakin bu, asan olmadı. Fenerbahçənin vitse-prezidenti olmaq böyük bir məsuliyyət idi və bu vəzifəni çox sevirdim. Öhdəsindən gələ bildim, amma bu, mənim üçün çox ağır yük oldu. Təsəvvür edilə biləcək ən intensiv həyatı yaşadığım bir vaxtda Fenerbahçədə vitse-prezident olduğumda klubda çox uzun saatlar keçirməyə başladım. İş yükü doğrudan da çox ağır idi və Supermen olmadığımı anladım," – deyə bildirib.

"Ali Koç mənə ayrılmaq üçün icazə verdi"

Fenerbahçədən ayrılma prosesi barədə danışan Ilıcalı əlavə edib:

"Hal-hazırda hər şeyi gizli saxlamaq istəyirəm, çünki baş verənlər klub daxilində yaşandı və verəcəyim hər hansı açıqlama insanları incidə bilər. Bu isə mənim istədiyim bir şey deyil. Hazırda ayrılmağımla bağlı hər hansı şərh vermək istəmirəm. Ayrılmaq qərarını verdim və çox yaxşı dostum olan prezident Ali Koçdan icazə istədim. O da mənə icazə verdi. Ali Koç klub adına açıqlama verərək, səylərimi yüksək qiymətləndirdiyini bildirdi. Bu, mənim üçün çox mənalı idi. Həmişə olduğu kimi böyük bir Fenerbahçe azarkeşi olaraq qalacağam və stadiona mütəmadi gedəcəyəm."

"Karyeramın ən çətin ili idi"

Fenerbahçədəki vəzifə müddətini "karyerasının ən çətin ili" kimi xarakterizə edən Ilıcalı sözlərini belə tamamladı:

"Həqiqətən çətin günlər yaşadığımı deyə bilərəm. Fenerbahçənin həm evdə, həm də səfərdə keçirdiyi bütün oyunlarda klubu təmsil etdim. Bu, mənim üçün bir şərəf idi. Amma Hull City də mənim üçün çox vacib idi. Bu, mənim üçün çox çətin bir dövr idi."

Ulusum.az