Şumaxerin Ferrari-si rekord qiymətə satıldı – 15,98 milyon avro

Əfsanəvi pilot Mixael Şumaxerin sükanı arxasında tarixi uğurlar qazandığı “Ferrari F2001” yarış avtomobili astronomik qiymətə satılıb. RM Sotheby’s tərəfindən təşkil olunan hərracda bu ikonik maşın tam 15,98 milyon avroya yeni sahibini tapıb.

Halbuki satışa çıxarılan avtomobilin ilkin qiyməti 8 milyon avro civarında dəyərləndirilirdi. Nəticə isə gözləntiləri ikiqat üstələyərək həm avtomobilin tarixi əhəmiyyətini, həm də Şumaxerə olan sonsuz marağı bir daha təsdiqlədi.

Qeyd edək ki, Mixael Şumaxer bu avtomobillə 2001-ci ildə Macarıstan və Monako Qran-Prilərində qələbə qazanmış, elə həmin il də beşinci dəfə “Formula 1” çempionu titulunu əldə etmişdi. Ferrari F2001 modeli isə Scuderia Ferrari komandasının ən parlaq texniki nailiyyətlərindən biri hesab olunur.

Alıcının kimliyi açıqlanmayıb – yeni sahib, görünür, avtomobillə yanaşı, anonim qalmağı da üstün tutub.

Ulusum.az