Premyer Liqada 49 Bərabərliklə Son 11 İlin Rekordu Qırıldı

2024/25 Misli Premyer Liqası mövsümündə qeydə alınan heç-heçə sayı son 11 ilin rekordunu təzələdi.

33-cü turun yekununda cari mövsümdə qeydə alınan heç-heçələrin ümumi sayı 49-a çatdı və bu nəticə ilə 2015/16 mövsümündəki 47 bərabərliklik rekord göstəricisi geridə qoyuldu. Əvvəlki ən yüksək göstərici isə 2013/14 mövsümündə 50 heç-heçə ilə qeydə alınmışdı.

Son turda keçirilən üç qarşılaşma da bərabərliklə başa çatdı: “Şamaxı” – “Səbail” və “Araz-Naxçıvan” – “Sabah” oyunları 1:1, “Neftçi” – “Kəpəz” matçı isə 2:2 hesabı ilə nəticələndi. Bu artan heç-heçə sayı, liqada komandalar arasında rəqabətin daha da gücləndiyini və oyunların nəticələrinin əvvəlcədən proqnozlaşdırılmasının çətinləşdiyini göstərir.

✍️"Ulusum".az