Soçidə xəstəxananı su basıb

Soçidə Xosta çayı sahilindən çıxıb və Soçidəki 3 saylı xəstəxananı su basıb. 50-yə yaxın insan xilas edilib, xəsarət alan olmayıb.

Məlumata görə, bu gecə xəstəxananın yerləşdiyi Xostinski rayonuna çoxlu miqdarda - 125 mm yağış yağıb. Nəticədə çay məcrasından çıxaraq xəstəxananın zirzəmisini basıb. Canlı qüvvə və 38 texnika vasitəsilə fəsadlar aradan qaldırılıb.

Bundan əvvəl rayon Fövqəladə Hallar Nazirliyi rayonda leysan xarakterli yağış yağacağı, küləyin sürəti saniyədə 23 metrə çatacağı, həmçinin tornado təhlükəsi barədə məlumat vermişdi.

Eltun Məmmədov