Lerikdə "UAZ" dağa çırpılıb, xəsarət alanlar var

Lerikdə yol-nəqliyyat hadisəsi baş verib.

Hadisə Lerik rayonunun ucqar dağ kəndi olan Qışlaq ərazisində baş verib. Lerik rayon Hamarat kənd sakini 1958-ci il təvəllüdlü Şirvan Xaliq oğlu Yusubov idarə etdiyi "UAZ" markalı avtomobillə hərəkətdə olarkən idarəetməni itirib. Nəqliyyat vasitəsi yol kənarındakı dağa çırpılıb. Qəza nəticəsində sürücü və avtomobildə olanlar 1998-ci il təvəllüdlü Cavid Raqib oğlu Dadaşzadə və 1967-ci il təvəllüdlü Mirzə Miri oğlu Ağayev xəsarət alıblar. Hər üç yaralı Lənkəran rayon mərkəzi xəstəxanasına çatdırılıblar.
Hadisə şahidlərinin sözlərinə görə qəzaya səbəb avtomobilin əyləc sistemində yaranan nasazlıq olub.

Qeyd edək ki, hər üç şəxs qəbir daşları düzəldən ustadır və onlar rəhmətə gedən şəxs üçün baş daşı düzəltməyə gedirdilər.

Faktla bağlı araşdırma aparılır.

Eltun Məmmədov