Sunami panikası, tıxac və Oprah qalmaqalı – Havay adaları silkələndi

Rusiya sahillərində, Kamçatka yarımadası yaxınlığında 7.4–8.8 bal gücündə, 30 km dərinlikdə baş verən zəlzələ Havay adalarında ciddi təşvişə səbəb olub. Güclü yeraltı təkanlardan sonra ABŞ səlahiyyətli qurumları Havay üçün sunami xəbərdarlığı yayımlayıb.

Maui adasında vəziyyət kritikləşdi

Sunami xəbərdarlığı fonunda Maui adasında yerləşən Kahului hava limanında bütün reyslər ləğv olunub. Terminalda təxminən 200 sərnişin təxliyə gözləyir. Sahilboyu yaşayan əhali isə adanın iç bölgələrinə doğru köç etməyə başlayıb. Bu, xüsusilə Maui adasında uzun tıxaclara və nəqliyyatın iflic olmasına səbəb olub.

Honoluluda siqnallar səsləndi, sahillər boşaldı

Havay ştatının paytaxtı Honoluluda vəziyyət daha da gərginləşib. Sahillər boşaldılıb, siqnallar səsləndirilib və əhali təcili şəkildə daha təhlükəsiz ərazilərə yönləndirilib.

Oprah Uinfri ilə bağlı narazılıqlar və açıqlamalar

Sosial mediada məşhur Hollivud ulduzu Oprah Uinfri sərt tənqid hədəfinə çevrilib. Yerli sakinlər onun Maui adasındakı şəxsi yolunu ictimaiyyətin istifadəsinə açmamasından narazı qalıb və bu qərarın evakuasiyanı çətinləşdirdiyini iddia ediblər.

Lakin daha sonra yayılan rəsmi açıqlamalarda Oprahın komandasının hüquq-mühafizə orqanları və FEMA ilə əməkdaşlıq edərək yolu təcili yardım məqsədilə açdığı və hər dəfə 50 avtomobilin keçməsinə şərait yaratdığı bildirilib.

Qeyd edək ki, Oprah Uinfri Maui adasında 518 hektara yaxın torpaq sahəsinə sahibdir.

Kamçatkada baş verən zəlzələ Havay adalarında ciddi narahatlığa səbəb olub. Aeroportlarda reyslər ləğv olunub, yollar bağlanıb, insanlar isə təhlükəsiz ərazilərə yönləndirilib. Hadisə fonunda məşhurların davranışları belə cəmiyyətin diqqət mərkəzinə düşüb.

Ulusum.az