Səyyah qadın aktiv vulkan kraterinə düşdü

Braziliyalı 26 yaşlı səyyah Juliana Marins İndoneziyada yerləşən aktiv Rindjani vulkanının kraterinə düşüb. Bu barədə BBC məlumat yayıb. Rəsmilərin sözlərinə görə, o, turist qrupuyla birlikdə yürüyüşə çıxmış, lakin bir müddət sonra itkin düşmüşdür.

Xilasedicilərin bildirdiyinə görə, o, vulkanın krateri yaxınlığındakı qayadan yıxılıb. Axtarış zamanı xilasedicilər qadının fəryadını eşidiblər. Tapıldığı anda onun vəziyyəti normal olub, lakin görünür ki, şok keçirmişdi.

Bir müddət sonra xilasedicilər onunla yenidən əlaqə saxlamağa çalışsalar da, cavab ala bilməyiblər. Ertəsi gün səhər pilotsuz uçuş aparatları Juliananı əvvəlki yerdə tapmayıb. Duman və pis hava şəraiti axtarışları çətinləşdirib.

Növbəti gün Juliana bir qədər aşağıda aşkarlanıb, lakin əlverişsiz şərait səbəbindən xilasetmə əməliyyatı dayandırılıb. Onun hazırkı vəziyyəti barədə məlumat verilmir.

Ulusum.az