Liverpulda Qələbə Bayramı Faciəyə Döndü – Onlarla Yaralı

Böyük Britaniyanın Liverpul şəhərinin mərkəzində minik avtomobilinin piyadaların üzərinə sürməsi nəticəsində 47 nəfər xəsarət alıb.

Bu barədə yerli media məlumat yayıb.

Hadisədən sonra ümumilikdə 27 nəfər xəstəxanaya yerləşdirilib. Onlardan ikisinin – o cümlədən bir uşağın – vəziyyəti ağırdır.

Mersisayd polisi rəsmisi Cenny Sims mətbuat konfransında bildirib ki, insidentin terrorla əlaqəsi yoxdur.

"Onu deyə bilərəm ki, bu hadisənin tək başına törədildiyini düşünürük və hazırda başqa heç kəsi axtarmırıq", – deyə Sims qeyd edib.

Məlumata görə, sükan arxasında olan 53 yaşlı britaniyalı saxlanılıb və hazırda nəzarət altındadır.

Hadisə yerindən yayımlanan görüntülərdə avtomobilin yüksək sürətlə "Liverpul" futbol klubunun Premyer Liqadakı qələbəsini qeyd edən azarkeşlərin üzərinə sürdüyü görünür.

Ulusum.az