Terror hazırlayan daha 8 nəfər SAXLANILDI - EKSKLÜZİV

Türkiyə Daxili İşlər Nazirliyi silsilə partlayışlar hazırlayan 8 terrorçunun saxlanıldığını açıqlayıb.

ULUSUM.az saytı xəbər verir ki, qonşu ölkədə İŞİD terror təşkilatına qarşı keçirilən "Bozdoğan-32" əməliyyatında 8 şübhəli saxlanılıb.

Onların üzərindən bomba hazırlamaq üçün nəzərdə tutulan külli miqdarda partlayıcı maddə müsadirə edilib.

Daxili işlər naziri Əli Erlikaya İstanbulda baş hərfləri K.A olan şəxsin saxlanıldığını bildirib. O, partlayıcı kimyəvi maddələri sınaqdan keçirməkdə ittiham olunur.
Mütəxəssislərin qənaətincə, həmin partlayıcı maddələr genişmiqyaslı partlayışlara səbəb ola bilərdi.
Daha 7 nəfər də həbs edilib

Bundan əvvəl Türkiyə Daxili İşlər Nazirliyinin rəhbəri eyni islamçı qruplaşma ilə əlaqədə şübhəli bilinən 23 nəfərin saxlanıldığını açıqlamışdı.

Qeyd edək ki, ötən il iyunun 1-dən indiyədək Türkiyədə 1422 analoji əməliyyat keçirilib. Nəticədə, təxminən 3 min nəfər saxlanılıb, onlardan 718-i terror fəaliyyətinə görə həbs edilib.

Rəşad Ələkbərov