“Ermənistan” AES bağlanır, ABŞ və Aİ yenisini inşa edəcək

ABŞ və Avropa İttifaqı Ermənistanda enerjinin diversifikasiyası çərçivəsində modul tipli atom-elektrik stansiyası inşa edəcək.

Ulusum.az xəbər verir ki, bu barədə “Hraparak“ nəşri məlumat yayıb.

Yazıda bildirilir ki, bununla bağlı gizli razılaşma Avropa Komissiyasının prezidenti Ursula von der Leyen və ABŞ dövlət katibi Entoni Blinkenlə görüşlərdə əldə edilib. Öz növbəsində rəsmi İrəvan hələlik müvafiq tələbin irəli sürüldüyünü inkar edir.

Məqalənin müəllifi yazır ki, Cənubi Qafqazda işləyən yeganə atom-elektrik stansiyası olan “Ermənistan” AES-in bağlanması barədə razılıq əldə olunub.

Qərb Ermənistanı dinc məqsədlər üçün demək olar ki, istifadə edilməyən atom-elektrik stansiyası inşa etməklə bağlı çağırış edib. Bu cür AES-lər əsasən hərbi bazalar üçün tikilir.

Qeyd edək ki, son illərdə Azərbaycan və Türkiyə rəsmi İrəvanın qarşısında “Ermənistan” AES-in bağlanması tələbini qoyub.